बार्सिलोना। स्पेनको लोकप्रिय पर्यटकीय गन्तव्य बार्सिलोनाको सग्रादा फैमिलिया आइतबार नेपाली कला, संगीत र संस्कृतिको विशेष प्रस्तुतिले उज्यालियो। विश्वप्रसिद्ध यो गिर्जाघरको प्राङ्गणमा नेपाली झण्डाका रंगहरू, ढाका टोपी र गुन्यु चोलीले सजिएका सहभागीहरूले यस्तो अनुभूति गराए जस्तो नेपाल आफैं बार्सिलोनाको मुटुमा बोलिरहेको होस्। 

पारिलो घाममा नेपाली संस्कृति झल्काउने विभिन्न जातजातिका भेषभूषाले भरिएको यो माहोल स्वाभाविक रूपमा सबैको ध्यान तान्ने खालको थियो। त्यसमाथि, नेपाली पाठशाला बार्सिलोनाका बालबालिकाहरूले परम्परागत पोशाकमा सजिएर नेपालबारे आत्मविश्वासका साथ प्रस्तुत गर्न थालेपछि उपस्थित सबैको मन छोयो। 

ती बालबालिकाहरूको मुहारमा मुस्कानको चमक, पहिरनमा नेपालीपनको गौरव अनि प्रस्तुतीकरणमा संस्कार मिसिएको थियो। उनीहरूले आफ्नो सन्देश प्रस्तुत गर्दा दर्शकहरू भावविभोर भएका थिए। यो सांस्कृतिक कार्यक्रममा उपस्थित व्यक्तिहरूले केवल नेपाली संस्कृति हेर्ने मात्र होइन, त्यसलाई महसुस गर्ने र नजिकबाट अनुभव गर्ने अवसर पाए। 

सग्रादा फैमिलियाको यो ऐतिहासिक क्षणले नेपाली समुदायको पहिचानलाई अन्तर्राष्ट्रिय स्तरमा उठान गरेको अनुभूति दिलाएको छ। नेपाली भेषभूषा र झण्डाका रंगहरूले गुञ्जिएको यो विशेष कार्यक्रमले बार्सिलोनाका स्थानीयवासी र पर्यटकहरूलाई नेपालका विविधताहरू नजिकबाट चिन्ने अवसर प्रदान गर्‍यो।